球壇話當年|朱志光福建教練生涯 邊個非洲球員賣牛來港闖出名堂?

更新時間 (HKT): 2021.05.23 06:00

千禧年代港甲總是隊數不足,充斥着中國球會的那個時候,曾出現過一支名為福建的球會。有着很中國的名字,福建確實與福建有關,但福建確實是香港球會,在港甲的短短三季,產出過一些名將,更是最佳教練朱志光的啟蒙。

記者/攝影:禤家民

南城地產、香雪製藥、日之泉等,千禧年代有過不少這些來自中國的球會出戰港超聯。2001/02球季取得港乙冠軍而升班的福建,名字甚至比那些中國球會更中國,但卻是不折不扣的香港球會。福建雖然只留在港甲短短三個球季,但不時踢出驚喜,名符其實是「蔗渣價踢出燒鵝味道」,出產過唐建文、蘇來強、黃展鴻、趙俊傑等在職業球壇多年的球員,現為傑志總監兼主教練的朱志光,也是在福建展開教練生涯。

邀朱sir講福建,他先講球員時代的經歷,他說當時球市好,物價也不像現在高,所以球員很少計劃掛靴後的生活,「以前搵到錢,畀到首期,買落疊樓就ok啦,喺香港解決咗住,就好多嘢都易解決。」他說當時樓價不像現時般,很多球員都可以負擔,「球員嗰時都唔恨出糧,獎金先緊要,有時球隊直頭出現金獎金,踢完就畀,有人唔帶銀包出嚟踢波,博一鋪,踢完就有錢。」他說,當時做個銀行經理,月薪可能只有三千多元,但一場比賽的贏波獎金,可能已有800至1,500元。

如當時大部份球員一樣,朱sir也沒有計劃過掛靴後成為教練,這時候他又再次講出他的名言,「變化比計劃嚟得快,真係㗎。」朱sir掛靴後繼續踢衞生波,認識一些球會中人,有一日被問到,「朱仔,你都教開波,有隊波想搵你幫吓手。」結果朱sir就成為了福建升上甲組後的教練,他笑言:「福建當時畀我感覺係搞籃球嘅,有翁金驊等港隊。嗰時喺球會都有間房,自己搞好多足球嘢,註冊、申請工作證等,當時得幾間大會有專人做,細球會呢,我後尾唔知點摸摸吓,就識搞工作證同球員註冊。」連球衣也是朱sir負責,當時他第一年找到Puma,之後又有美津濃贊助,「顏色都係我定,球會開頭話過要綠色,但我攞過黃色同藍色,都冇理到。」

升上甲組後,福建組軍也靠朱sir,「有啲球員我本身識,我踢星島時啲青年軍,球圈好細,知啲球員點樣搵,搞福建要咩球員,搞傑志搵咩球員,你要好清楚,好似做導演監製咁。」問他在福建第一個找的球員是誰,朱sir思考良久,「好似都係唐建文,佢15、16歲已經跟我,嗰時朋友叫我去踢波,佢跟佢啲阿叔去踢,咁就識咗。唐文都幾乖,踢到成家立室,又入埋港隊,對巴林踢得幾好,我喺場邊見到都無限感慨。我唔係特別鍾意佢,我對球員一視同仁。」

在當時福建陣中,最後發展得最好的球員是高梵,也可算是是艾力士和朱兆基外,朱sir另一個經典,「以前跑馬地,差唔多每日都有人嚟試腳,特別係非洲。我好記得嗰日佢第一日着對白鞋,唔係純白飯魚嚟,但都跑得好快,我就係睇佢跑得快,留咗佢喺度。」非洲球員為求改善生活,決心很大,「佢話我聽佢賣咗隻牛嚟買機票出嚟闖。」

朱sir指,出名死球好的蘇來強,當時連斬角球都乏力,「但佢就係唔認輸,佢同大眼(黃展鴻)都有樣好,基本球底好,街波大,成日打小組。」他指兩人首季經驗不足,對抗性差而常被搶走控球,但一季後已適應,朱sir續說:「但一隊波又唔可以全部呢啲人,要有跑得快,隊友都笑高梵唔好波,得個跑字,但經足球成就得好多嘢嘅係佢,佢喺大陸接近10年,平均一個月搵幾錢?佢最後一份約,隊波踢港超,都講緊17、18萬一個月。佢喺加納有間學校,美國識咗個女朋友,邁阿密有間屋。我睇住佢嗰陣買個菠蘿包都冇錢,我成日買畀佢食,佢好鍾意食㗎。」

朱sir有深刻印象的,還有張春暉,「佢好識拖時間,我冇教佢㗎,佢知隊波要同時間比賽,有時接個高波,撞落人度自己跌低,自己除咗對手套,然後又要搵人幫佢戴番。咁你弱過人,就係咁,足球比賽一部份。」

防守反擊、拖時間,就是當時福建的生存之道。不被看好下,福建最終留在甲組三個球季,很多強隊面對福建也不能保證全身而退,朱sir特別記得晨曦和愉園鬥到最後一輪的2004/05球季,煞科戰前愉園與晨曦同分,但得失球佔優,愉園擊敗傑志則極有可能封王;晨曦面對要護級的福建,除了要全取三分,也要盡力追得失球數。結果,愉園只與傑志以3:3賽和,但晨曦也不是輕易贏到冠軍,朱sir說:「好多人以為好易贏,但我哋去到八十幾分鐘先失守,絕對唔容易。」晨曦該仗在83分鐘由亞古沙建功,以1:0擊敗福建封王,而這亦是福建在港甲的最後一仗。

難忘的還有同季對流浪的一仗,補時長達15分鐘,「我記我有球迷掟鞋出嚟,場面好混亂。我諗個球證覺得球員拖時間,但拖時間咪補7分、8分鐘囉,咁補法不如打多半場?」

福建的經歷,可算是為朱sir打下了根基,「嗰幾年建立咗我好多足球上防守嘅思維,唔係普通嘅思維。香港足球咩時候好直接,咩時候唔直接,嗰時啟發咗我好多。」朱sir最近很喜歡用銀包作比喻,「教防守就易,唔使諗點走位,擺喺度等。好似有人畀個銀包你看住,畀個大餅你叫你唔好跌咗佢咁樣咋嘛。」今季帶領傑志完成兩循環14場賽事後僅失9球,也許與十多年前福建的啟示有關。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner