求驗客手記:傳巴利歐國盃後掛靴 轉戰高球界

更新時間 (HKT): 2021.05.28 02:00
■巴利(箭嘴示)舉起「威爾斯、高爾夫、馬德里」旗,表達對高爾夫球嘅喜愛。資料圖片

加里夫巴利今季喺熱刺季尾開始大爆發,最後6場賽事一共入咗6球,煞科戰更加後備上陣22分鐘就梅開二度,幫球隊反勝李斯特城攞到下季歐洲賽嘅資格。原本一直都講緊巴利今季之後就會返去皇家馬德里,但係近日竟然有消息傳出,原來巴利打算喺今屆歐國盃之後退休,轉戰高爾夫球界!

早喺英超煞科日嘅賽後,巴利已經透露過會喺歐國盃之後作出重大決定:「我知道自己做緊咩,但係如果我家陣講嘢嘅話會引起好大混亂。呢一刻我淨係想踢好歐國盃,其他決定將會喺歐國盃之後先公佈。」西媒ABC報道,今年只係31歲嘅巴利同屋企人之前曾經傾過掛靴嘅可能性。年薪高達1,510萬鎊(約1.65億港元)嘅佢,更加願意一次過收750萬鎊解約費,正式同皇馬結束賓主關係,然後喺歐國盃之後掛靴。

據報巴利想退休嘅主因都係想保護屋企人,等佢哋唔使再受傳媒騷擾,亦都有傳佢會向職業高爾夫球界發展。眾所周知巴利係一位高球發燒友,佢2019年年尾幫威爾斯攞到歐國盃決賽周參賽資格之後,更加半講笑咁舉起咗寫住「威爾斯、高爾夫、馬德里」嘅國旗,表示其實高爾夫球對佢嚟講仲緊要過喺皇馬嘅足球事業。

不過其實亦都有傳聞話如果巴利成功同皇馬解約,熱刺將會以較低條件搵番巴利返嚟。英媒另一邊廂喺消息傳出之後亦都搵過巴利嘅經理人巴尼特,不過佢就全盤否認報道,仲話啲新聞係垃圾㖭。

包羅萬有,「體」得舒服,即Like「蘋果體育」FB專頁!
BannerBanner