Goal富帥:前鋒難捉「鹿」追「細」

更新時間 (HKT): 2021.05.28 02:00

周中兩場澳職都中晒盤,推介獅吼同鳳凰,唔單止開晒下盤,連波都贏埋,本身咁順都想繼續講澳職,但係見到日職周中比賽結果非常吊詭,咁好玩不如周末都返嚟日本走一轉。

今周日職大波一定係下星期日場川崎前鋒(圖)對鹿島鹿角;為咗準備亞冠盃,前鋒近期表現非常不穩,對上一場對下游分子湘南比馬都唔能夠全取三分,以佢哋堂堂冠軍真係失望,特別上仗對比馬,要靠下半場換番入主力前鋒李安度達美奧,先1:1逼和對手。教練鬼木達排出兩套陣容應付各項賽事,似乎二線陣容唔係好夠踢,下個月亞冠盃開波,鬼木達真係要好好諗定點安排。

鹿島鹿角暫時都仲係處於中游,不過換教練後慢慢爬番上嚟,周中再贏大阪櫻花,近6場聯賽贏5場;從陰謀論睇,前鋒喺聯賽已經帶甩成條街,目標日職同亞冠盃雙料冠軍,絕對唔過份,不過唔想成為亞洲其他球隊眾矢之的,可以預期佢哋呢期聯賽一定示人以弱,初盤前鋒讓到一球,睇死佢再和一場,下盤要硬,再追多個「細」。

下星期日另一場神戶勝利船主場對鳥棲砂岩,真係引用黃興桂嘅金句,用蔗渣價錢踢出燒鵝嘅味道,鳥棲砂岩呢隊蔗渣,冇咩大牌外援頂級國腳,但就踢到第三位,已經七場聯賽不敗,神户反而就似燒鵝,又有恩尼斯達、華美倫,不過講真,佢哋仲有幾多貨吖,呢場波神戶要讓平/半,留意埋陣容,如果恩尼斯達有份踢,信我買下盤,不要問只要信,因為有佢,隊波就好慢。

文:黃耀富

截稿前馬會尚未開盤,盤口僅供參考,讀者記得留意足智彩網頁。

包羅萬有,「體」得舒服,即Like「蘋果體育」FB專頁!
BannerBanner