求驗客手記:尼馬疑性侵員工一剔斬纜

更新時間 (HKT): 2021.05.29 02:00
■尼馬又捲入桃色醜聞,今次有排煩。 資料圖片

《華爾街日報》周四報道,巴黎聖日耳門球星尼馬舊年同合作多年嘅贊助商Nike分道揚鑣,原來大有內情,理由係「一剔」一名女員工,曾經俾呢名巴西前鋒性侵犯。

《華爾街日報》根據知情人士消息,以及得到嘅文件指出,一名「一剔」女職員曾經向同事同朋友投訴,2016年喺紐約進行品牌活動嗰陣,尼馬曾喺酒店房強逼要佢口交。該名員工喺2018年正式向公司作出投訴,「一剔」於是喺2019年委託咗一間律師行進行調查,並決定暫停尼馬所有宣傳活動。「一剔」最後喺2020年,終止同尼馬嘅15年合作關係,之後尼馬亦轉投豹牌旗下。

其實「一剔」同尼馬本身仲有八年合約,但《華爾街日報》就話因為尼馬當時唔肯配合調查工作,「一剔」先決定斬纜。不過,尼馬嘅發言人已否認有關指控,仲強調雙方係基於商業理由先結束合作關係。查實尼馬個底花晒,喺2019年被指喺巴黎一間酒店強姦一名女子,但因為證據不足獲撤銷控罪,原告人事後仲被控欺詐、誹謗同勒索等罪名,有呢啲傳聞都唔出奇。

包羅萬有,「體」得舒服,即Like「蘋果體育」FB專頁!
BannerBanner