求驗客手記:射12碼唔睇貓紙勢被清走 迪基亞衰太自信

更新時間 (HKT): 2021.05.29 02:00

曼聯喺周三場歐霸盃決賽同維拉利爾踢到互射12碼階段決勝負,呢次超漫長嘅PK戰,雙方射完頭10輪冇個宴客,結果去到第11輪,門將迪基亞操刀就孭咗罪人隻鑊。原本12碼就係聽天由命嘅遊戲,唔應該怪任何人、接波多過射波嘅門將,但作為一位世界級門將,迪基亞成個生涯撲救12碼比率又真係太低,不足兩成,家陣仲要俾人發現佢冇跟足守門員教練提供嘅「貓紙」,喺過程中自把自為,結果佢今次又真係一球都救唔到,都好難唔怪佢。

手機用戶請按此放大圖表

曼聯望迪基亞換奧比歷

賽後,網上流出一張曼聯教練團畀迪基亞嘅12碼貓紙,當時收埋咗喺迪基亞抹汗嘅毛巾中,列出對方球員嘅慣用腳同預計會射嘅方向,建議佢應該向邊面撲波,但後尾大家都發現呢張貓紙唔係好準,只有三個預測係正確。迪基亞唔知係咪都嫌貓紙唔掂,射完頭五輪發現有出入後,進入突然死亡階段後就有啲跟,有啲唔跟,當中第六輪嗰陣,佢就冇遵照貓紙叫佢留喺中間,反而撲向左邊,結果摩西斯高美斯真係射中間入網。

迪基亞今次叫做咗罪人,但曼聯班隊友都好窩心,除咗當晚佢一射失後,個個爭住上前拍膊頭安慰,賽後亦有好多隊友都喺ig鼓勵佢,希望佢唔好自責。迪基亞隔咗一日後,亦透過twitter表明自己唔會氣餒:「跌倒後再起番身。從經驗中學習,再次努力爭勝。@ManUtd感謝你哋嘅支持。」不過,曼聯班高層可能就唔係咁睇,難得入決賽但輸波,有指佢哋已經決定今夏一定會清洗迪基亞,而且仲諗住將佢送返去佢嘅前東家馬德里體育會,希望用佢做籌碼嚟引入對方門將奧比歷,後者身價起碼高達7,000萬鎊,如果曼聯攞迪基亞入交易條件,就可以降低奧比歷嘅轉會費。

B費唔揀射先至係「輸波罪人」

不過倫敦政治經濟學院嘅心理學專家柏拉斯奧斯靴達就認為,以隊長身份出戰嘅般奴費南迪斯(B費),喺擲毫嗰陣贏出後讓維拉利爾先射,先係曼聯落敗嘅關鍵因素。佢以自己過去嘅研究,指出後射一隊往往要承受更大嘅心理壓力,所以勝算會降低20個百分點。「我以為球壇大部份人都會知道,(先射)會有60:40優勢。B費將呢20個百分點優勢拱手讓畀維拉利爾,我真係十分震驚。」

無論怪迪基亞定B費都好,曼聯失盃已成事實,都係等領隊蘇斯克查諗諗今個夏天點樣執好隊波。要講周三場波邊個踢得差,紅魔入面其實拉舒福特都算係其中一個,有慈善球王之稱嘅佢,之前就兒童饑荒嘅議題同前美國總統奧巴馬進行過一次Zoom嘅對談,佢就覺得可以同咁偉大嘅人物交流,好似好唔現實咁,而奧巴馬就大讚福仔,話自己23歲嗰陣都未識得好似福仔咁關心社會,睇嚟福仔以後真係可以向從政條路發展。

包羅萬有,「體」得舒服,即Like「蘋果體育」FB專頁!
BannerBanner