趣趣地:肥安再上「馬」拖肥竟想搵謝四

更新時間 (HKT): 2021.06.03 02:00

前皇家馬德里教練施丹上禮拜先辭職,禮拜二皇馬就已經成功撬到愛華頓領隊安察洛堤回巢執教,成為球隊未來三季嘅教練。安察洛堤曾經教過皇馬兩個球季,贏過西班牙盃、歐聯、世冠盃同埋歐洲超級盃。佢之後輾轉執教過拜仁慕尼黑、拿玻里同愛華頓,不過上季帶領「拖肥」以第10名完季,無緣歐洲賽,最終執教18個月後離開,淨係留低咗跟咗佢好多年嘅球星占士洛迪古斯喺愛華頓。另邊廂拖肥要搵繼任人,據英媒The Athletic報道,拖肥有考慮過上季帶領格拉斯哥流浪不敗奪冠嘅謝拉特,不過謝四係利物浦青訓產品,睇怕都冇乜可能執教死對頭拖肥㗎喇,至於目前仲係量地官嘅前紅軍主帥賓尼迪斯,據悉亦係愛華頓考慮對象之一。

包羅萬有,「體」得舒服,即Like「蘋果體育」FB專頁!
BannerBanner