亞洲放題:光輝強攻「大」手碌「卡」

更新時間 (HKT): 2021.06.05 02:00

講起女足,澳洲雖然未拎過女子世界盃,不過近期成績一啲都唔輸蝕畀日本,家吓世界排名第九,係亞洲區最高,仲有唔少國腳效力英超,踢緊阿仙奴已經有三個,不過今次唔講佢哋,反而想講車路士前鋒卡爾。

車路士男足今季都威風八面,贏到歐聯,其實女子隊都好勁,今季就拎到女子英超冠軍,不過歐聯決賽就輸俾巴塞隆拿;卡爾就係車仔首席前鋒,聯賽轟入21球成為神射手。撇開足球事業,27歲嘅卡爾私生活都幾多人談論,事關佢係公開嘅女同志,女朋友係一齊喺珀斯光輝出身嘅舊隊友斯坦頓,佢哋都不時喺ig晒恩愛。卡爾仲話如果拎到奧運或者世界盃,就會同斯坦頓結婚,2023年女子世界盃就喺澳洲同新西蘭舉行,澳洲有主場之利,真係有機會捧到盃,澳洲亦打入東奧決賽周,不過同組有美國同瑞典,唔算易踢。

講返澳職心水,今周係常規賽最後一輪,阿德萊德聯周中和波都夠分上岸,前六位置已經齊晒腳,唔少波都變例行公事;卡爾就喺珀斯光輝出身,但男子隊今季就唔生性,上仗輸俾布里斯班獅吼已經無緣季後賽,星期六作客紐卡素噴射機,兩隊都冇嘢爭,最後一場開放式鬥攻,入球「大」值得捧場。另外中岸水手主場對散晒嘅西部聯,應該可以拎到常規賽尾彩,讓半/一要上盤。下星期日場墨爾本打吡,墨爾本城穩奪常規賽冠軍,上仗半力就俾獅吼大炒,今場主場一眾主力應該復出,墨爾本勝利已無緣季後賽,季尾幾場都幾開放,上仗仲大勝西部聯6:1,兩隊無包袱鬥攻,要入球「大」。

文:牽牛

《亞洲放題》為讀者精選各大亞洲波筍盤,每個周六約定你任點任食。

包羅萬有,「體」得舒服,即Like「蘋果體育」FB專頁!
BannerBanner