港足|顏樂楓投理文成功蛻變 失意人球相隔8年再入選

更新時間 (HKT): 2021.06.08 06:00

有試過在家中找失物找極都找不到嗎?然後當你放棄了,失物就突然出現在眼前。這種感覺,大概就如顏樂楓一樣,他20歲時首度晉身大港腳,一直找尋第二次機會,等了又等,等到麻木。機會這回事,原來是可遇不可求,八年後的今日,他終於再度入選港足。

顏樂楓年僅18歲時就首度為母會傑志在聯賽披甲,20歲更已成為大港腳,在港足作客緬甸的賽事正選上陣,雖然該仗最終並不被承認為國際A級賽事,但其後在主場對新加坡的一戰後備入替,正式取得首頂「喼帽」。

20歲就成為大港腳,顏樂楓似乎前途無限,有望成為港足主力。顏樂楓當時也覺得晉身大港腳是理所當然的,「我一路都代表U23、U19等,好似U11、U12就一直有入選,去到20歲入大隊,好似成件事都順理成章,唔覺係好難得嘅機會。」只是他當時不知道,下一次入選要等八年。

說回加入職業足球的經歷,顏樂楓小時候踢黃大仙,認識了現晉峰總教練何信賢,「何sir介紹我畀當時嘅傑志青年軍教練識,應該13歲左右,然後一直踢青年軍、預備組,去到18歲第一次踢1隊。」顏樂楓在同齡球員中相當出眾,足球成長路沒太多挫折,「喺傑志一直係隊長,又攞冠軍,18歲踢1隊,呢個階段好順利。」踏入職業階段才發現世界很大,「嗰時後備為主,水平未夠其他球員,做後備好合理。但開始發覺如果我係教練,都唔會換到我㗎喎。」做球員,當然想落場,「要贏身邊嘅隊友已經唔易,呢個諗法以前唔會有,青年軍時選擇唔多,我多數都有份踢㗎嘛。」

接着,顏樂楓開始不斷的外借生涯,先是2012年外借到太陽飛馬,然後再去過皇室南區,2014年回到傑志,即有亞協盃上陣的機會,有入球,有助攻,但在隊內競爭激烈下,2016年再被外借到九巴元朗,一季後再被外借到理文。「四隊波,斷斷續續,踢得好又返傑志,半季、一季後咁又再借走。我係好想返傑志,嗰時外借係為爭表現,返去踢正選,每次外借都係呢個心態。」2018年,顏樂楓完成外借到理文的球季後,作出了一個重大決定。

「我好肯定同傑志講,我想離隊。」當時顏樂楓尚未決定會去那一支球隊,只是覺得需要離開傑志,「我覺得去到25歲,唔可以再用學習同等待嘅心態,我要實戰,如果唔係就太遲。加上我畢業,可以全身投入,對自己期望又大咗。考慮到我都唔夠黃洋大哥爭嘅環境下,我係必須要離開。」很多球員都想做one club man,但世上有幾多個馬甸尼?就算要做謝拉特也不容易。

這段來來回回傑志的時期,也令顏樂楓想通了一件事,「我嗰次入選港足,係教練見我年輕,有啲潛力,選我入去觀察吓,唔係因為有實力。」他曾經很渴望再代表香港出賽,但慢慢把這個心願擱置在一旁。

決定離開傑志後,顏樂楓收到陳曉明電話,「陳sir問我有冇興趣跟佢踢,我收到電話後,唔係太長時間就決定咗。」陳曉明當時剛成為理文主教練,開始建立球隊,兩人之前從未合作,「我對佢嘅認識係覺得佢比較有明確理念,對足球知識比較豐富,我可以學得多啲以前冇接觸過嘅嘢。」除了教練,最重要還是上陣機會,「我問過佢中場會有咩人,自己盤算過,有信心可以立足到。」

陳曉明也講過,與他合作的球員需要較多時間適應,顏樂楓也認為自己正式轉投理文後的首季有點迷茫,「陳sir比較多灌輸知識,作為球員要啲時間消化。去到第二季,開始覺得自己喺場上輕鬆咗,睇嘢快咗,即係預計嘅情況早咗,個腦諗嘢快咗。」顏樂楓踢法以活力見稱,但以前未能在場上盡顯長處,「可能明知自己好體能,反而會浪費咗好多無謂體力。」近季他專注防守,球迷反而見到他在進攻上有更多貢獻。

顏樂楓說,他近年在陳曉明指示下,在中場專注防務,減少進攻,但近兩季他在球迷心中的最大印像,可能是他的進攻能力,特別是遠射,「意外啦,其實冇刻意練遠射,以前反而練好多,因為以前想吖嘛。」原來又是另一個「家中找失物」的故事。除了入球,關鍵傳送也多,他續說:「我諗個分別係以前可能下下都踢,下下都唔中,家陣可能一吓就中。個感覺就好似開發咗我進攻技能咁,我覺得唔係傳球質素,反而係每個決定比以前準確咗,所以你哋覺得我比以前進攻咗,其實我覺得冇以前咁進攻。」

理文近兩季雄心壯志,挑戰錦標,可惜表現比較飄忽。顏樂楓指,2019年尾一段時期,全隊狀態大勇,但遇上疫情,「停擺前嘅銀牌決賽冇踢,我淨係未贏過銀牌,一直想贏,嗰時覺得好fit,之後踢返輸咗,好大遺憾。上年唔得諗住今年啦,點知取消埋。」他說,數據顯示,球員體能回復不到停擺前水平,但有過經驗後,之後幾次處理已較好,「冇辦法,要重新適應,鬥快搵方法。」 今年復賽初期,理文一度跌入低潮,到爭標組賽事才大爆發,顏樂楓說:「其一係主力射手離隊(尼迪利),然後傷得多,傷4、5個主力都幾誇張。」受傷的包括顏樂楓,他復出後球隊立即重回正軌,「都唔止我嘅,荷西安祖都係關鍵,所有隊員都明顯提升。」

連贏傑志及東方後,顏樂楓收到入選港足的消息,「嗰一刻未有感覺,仲有場波吖嘛。」到擊敗飛馬,反壓對手取得聯賽季軍後,顏樂楓開始參與港足訓練,「隔一日練波先發現,八年喇喎,都好難得。」

天道酬勤,顏樂楓得到隨港足赴巴林作賽的機會,但約兩星期的作客,加上回港後須隔離,換來的是要與家人分開一段時間。幸運地,顏樂楓有很支持他的家人,「由細到大佢哋都好支持我,細個嗰陣會阿爸會接送我去練波睇我練波,之後又會俾意見我,閒時都會一齊睇吓波踢吓波咁。阿媽就會喺屋企煮飯等我,有時我受傷要做手術,佢會特別煲啲補身嘅湯水我飲。佢哋從來都冇反對我踢波,呢方面我係好幸運嘅人。」

生命中很多事可遇不可求,刻意強求的得不到,而不曾被期待的往往會不期而至。顏樂楓近季表現好,記者們不時會問他有否想過再入選港足,他總是回答:「冇特別諗,做好自己控制到嘅事。」教練選不選他,不是顏樂楓可控制,他能做的是盡全力為理文踢好每一場,甚至每一球。做好了自己,終於再入選港足,顏樂楓現在可以做的,是為港足踢好每一球。

記者/攝影:禤家民

-----------------------------

蘋果App大升級 更簡潔更就手!了解更多立即下載體驗

-----------------------------

《體蘋果》陪你睇波講波

包羅萬有,「體」得舒服,即Like「蘋果體育」FB專頁!
BannerBanner