求驗客手記:歐國盃被困豪華酒店慘過坐監?
科頓意志大考驗

更新時間 (HKT): 2021.06.09 02:00

今屆歐國盃史無前例由咁多個國家一齊舉辦,有啲國家超着數,可以三場分組賽都喺地頭踢,當中包括恨捧大賽獎盃好耐嘅英格蘭。三獅如果喺D組首名出線,之後淘汰賽階段大部份比賽都可以繼續留喺倫敦。英足總早就定咗以聖佐治公園作為訓練基地,球員練完波就入住基地附近嘅希爾頓酒店;雖然酒店夠豪華又舒適,但因為疫情關係,一班球星就要好似入隔離營咁,成個月冇得同家人見面。呢種同外界隔絕嘅生活,上年去咗佛羅里達州奧蘭多班NBA球星都試過,𠵱家就輪到踢歐國盃班球員受喇。

英媒最近就揭露咗希爾頓酒店全貌,其實就係一間應有盡有嘅豪華酒店,泳池、健身室同會議室呢啲全部都有,而且以前每次國家隊召集都會住呢度,所以球員唔會陌生。不過防疫緣故,之前歐洲足協(UEFA)已經規定賽事要喺「bubble制」下進行,球員唔可以接觸外界,連屋企人都唔例外,一律冇得見,對佢哋嚟講肯定好折磨,所以今次歐國盃唔係踢波咁簡單,直情係意志力嘅極限挑戰咁,有啲球員如果心靈脆弱,分分鐘夜晚冚住張被偷偷地喊都唔定。

手機用戶請按此放大圖表

96年舒寧咸香港喪蒲

領隊修夫基都知難捱,所以今次同酒店傾完話要有少少改動,一班英軍球星住嘅房入面,會掛上英軍以往比賽嘅經典相,同時一啲當眼位都會有幫英軍打氣嘅橫額等,希望有啲新鮮感,等班球員唔會太悶。不過,我求大俠就覺得不如將球員啲全家福掛牆,又或者貼啲索女相,等班球員望到happy吓可能仲好;講真,由早到晚都係對住啲波,酒店牆又係呢啲嘢,你唔悶我都悶,唔通修夫基咁快唔記得,上年菲爾科頓同格連活特喺冰島踢歐國聯違反隔離令,電召少女上房開淫P件事?

唔係鼓勵班球員曳曳,不過英國《太陽報》呢排訪問咗英格蘭1996年歐國盃成員之一嘅舒寧咸,佢回憶嗰年喺歐國盃前嚟香港踢熱身賽,被拍到佢哋有晚落吧玩到癲晒,坐張牙醫凳等班侍應嚟灌酒,又玩到除晒衫,之後國內上下大肆抨擊嘅事;佢解釋都係因為當時成班英軍根本冇一日可以玩到咁狂野,日日都要備戰,所以就好似被困住嘅雀仔,一放出籠就變成咁,其實只係想講家陣呢班球員,應該會比25年前難受N倍。

賓韋特入選身價狂漲

至於英格蘭前日已經公佈咗會由白禮頓後衞賓韋特,代替退隊嘅阿歷山大阿諾特,再次無緣入選嘅連格就好大方,照樣喺twitter祝班隊友good luck,但球迷都戥「連王」慘;反而賓韋特有傳因為獲召,球會馬上將佢標價5,000萬鎊,係咪太過大想頭呢?

包羅萬有,「體」得舒服,即Like「蘋果體育」FB專頁!
BannerBanner