離譜!雅虎網PS3炒至6億港紙

更新時間 (HKT): 2006.11.16 00:00

近期IT界至Hit話題,肯定非因PS3全球缺貨,而導致瘋狂炒賣現象。本版已報道過香港水貨炒上$8,500高位、華人及黑幫喺日本排隊掃貨等浪潮,本以為「金蛋事件」告一段落,豈料日本雅虎拍賣網居然出現更荒誕之事,就係最高價競投PS3嘅買家,竟以一百億日圓搶貨!成6億幾港紙,擺明流料,賣機一方都唔會當係真,但事實並非出價者玩嘢咁簡單,原來搞事之人一早已出第一口低價競投,之後用另一戶口Bit到天價極限(即一百億日圓),後來者當然唔會高得過佢,到臨門截止投標一刻便取消天價競投,順理成章便能以早前低價中標!呢啲伎倆可謂卑劣之極,當然協議條款中買賣任何一方不滿中標價,均可取消是項交易,但正所謂嘥人時間之外,若不幸偶有率直人士中招,以為真係冇人出標而完成交易,結果便益咗呢班無賴,真係多謝都冇句兼笑到肚痛!
出現呢啲咁無謂嘅「局」,雅虎官方即時宣布中止呢類「胡鬧」出價,事件算是平息,但大家細心一想,咁快放上網拍賣,明顯亦屬出賣排隊時間而獲利之人,今勻被「黑吃黑」,好比炒樓之人被大鱷鯨吞番轉頭,值得可憐嗎?
記者:徐影龍

相關網址:forum4.gamer.com.tw/C.php?bsn=60281&snA=3127&locked=F&tnum=4&subbsn=0&Bpage=1

果然好玩 籽在四方,即like「果籽」FB專頁!
BannerBanner