黑鏡線索●九七後「日治」時代?

更新時間 (HKT): 2021.03.02 02:00

報道指,中共打算更改香港選舉規則,由選特首到選立法會區議會議員,全部都改,當然係會改到更加順暢咁執行北京嘅指示。

1997年7.1凌晨,就任首屆特首嘅董建華宣告「香港人喺歷史上第一次以明確嘅身份主宰自己嘅命運。」我唔知當時聽嘅人有幾多忍唔住笑,但而家回頭睇當然係笑中有淚。

《港英時代》作者鄺健銘,喺新出嘅增修版,好到肉咁點出九七前後嘅管治分別。愛國史觀標準答案,當然係九七前係亡我之心不死嘅帝國主義,管香港管得差,仲特登埋下地雷畀中共踩,最衰就係港英洗香港人腦,令到港人,尤其後生仔,人心未歸。

除咗「人心未歸」呢句係合乎事實,其餘嘅,稍為有健全認知嘅人,心裏面都知道係離行離迾。

英治香港 百無禁忌全球前列

點解移交咗之後,明明好喇,脫殖喇,學董建華話齋,當家作主喇,點解人心未歸,仲越行越遠?

首先,鄺指出,英治時代,其實管得好鬆手。呢點好明顯,事關好大部份走難落嚟英治香港嘅人,就係為咗逃避管得嚴好多嘅中国。英治香港,係全亞洲最百無禁忌嘅地方,就算係全世界都屬前列。而呢種作風,亦都同英國其他殖民地好一致。

至於點解英國殖民風格咁鬆手,有幾個可能因素。一來,英國本土管治文化,本身就比歐洲其他大國鬆手。第二,高壓管治成本好高,英帝國本質上係商業帝國,維穩費太高嘅話就得不償失,所以要用啲槓桿嘅方法,例如同當地精英合作,間接管治,所以越唔好搞當地文化風俗越好,免得就免。

第三,英帝國擴張過程,東湊西拼,係海外前線人員帶動,並唔係靠倫敦英明神武咁中央指揮、推行由上而下嘅政策。第四,商業帝國用商業邏輯,管治香港首先係商業考慮,而唔係乜嘢百年國恥、國家興亡咁嚴重,懶大義凜然嘅事情,唔使吓吓去到咁盡。

所以,唔係殖民就必定高壓。英治香港,比起中国近代任何地方,都自由好多,根本冇得比。

九七之後點呢?一嚟,中共政權,由掌權開始,就已經係行中央集權,管得細、管得嚴,同英國管治文化,完全南轅北轍。中共治下嘅中国,英治香港比,鬆緊程度簡直係差天共地。

二嚟,尤其喺發中国夢開始,中共將香港定位,為國家安全好重要一部份,令人𢲷晒頭,你有冇聽英國話香港影響到國家安全?但中共就硬屈你係就係。總之,中国夢要發,而香港問題,就係中国夢裏面好關鍵嘅國家安全問題。

兩樣加埋,就只得一個結果。中聯辦都講得好清楚,「維護國家安全,香港只有一国沒有兩制」。

同化政策 維護國家安全

九七後嘅殖民政權,係乜嘢風格?鄺指出,最似嘅,係日本殖民地風格。當年日本接管台灣,日殖官員曾經向英國顧問取經,問點管台灣好。英國顧問建議佢行英式懷柔間接管治。

但日本冇聽,日本為咗排除外國勢力影響,維護國家安全,反而大規模進行日語同化之類嘅政策。結果日治台灣只有一個冇牙嘅議會,後來索性連個議會都廢埋,行政完全主導。係咪好熟面口?

換句話講,香港九七之後,並冇乜嘢當家作主,只係換咗另一個殖民政權。弊在由一個開明寬鬆嘅,換成一個高壓好多嘅。人心回歸,歸乜Q?

撰文:宋漢生

fb : sunghsblog

果然好玩 籽在四方,即like「果籽」FB專頁!
BannerBanner